As festas e os eventos populares que teñen lugar en Moaña son unha mostra do carácter alegre e aberto dos seus habitantes, que celebran de forma especial as festas patronais da Virxe do Carme e de San Martiño; pero que tamén teñen tempo para as romarías tradicionais e as exaltacións gastronómicas dos seus produtos.
Así mesmo, o Entroido Moañés ten sona en toda Galicia e o Festival Intercéltico é xa un clásico dentro da oferta musical e cultural tanto de Galicia como de España.
Mercado Municipal: ten lugar todos os mércores e sábados do ano pola mañá na explanada do paseo marítimo que hai detrás da praza de abastos.
Festas e festivais
Entroido
Festa de sona en toda Galicia que comeza o sábado de entroido coa lectura do pregón na carpa do Palco da Música ás 17 horas e o tradicional reparto de filloas e orellas de balde da Asociación de Mulleres de Moaña de Entroido e destaca polo gran desfile do Enterro da Sardiña, que se celebra o Domingo de Piñata como peche a toda unha semana de festa e diversión..
Festival de Jazz
Dende a Asociación de Jazz de Moaña e o Concello de Moaña, cremos que a nosa vila debe dotarse dun espacio onde mostrar, desfrutar e espallar o xerme do jazz ás novas xeracións. Así naceu o Festival de Jazz de Moaña no 2018, que se celebra a mediados de agosto na Arboreda da Xunqueira.
Páxina en Facebook do Festival de Jazz de Moaña
Moaña Antiqua
Dende a Moaña Antiqua é unha festa medieval de artesanía que conta cos seus postos de comida, unha pitonisa, loitas medievais, os obradoiros infantís e animación de rúa no contorno de San Martiño en Moaña, e a súa igrexa do século XII que foi o berce da vila de Moaña. Celébrase cada ano na última fin de semana de xuño.
Páxina en Facebook Moaña Antiqua
Festival Intercéltico
O Festival Intercéltico do Morrazo é o máis veterano dos de Galicia, por ser o único celebrado de maneira ininterrompida dende 1.985.
Este espectáculo é xa un clásico dentro da oferta cultural e musical de Galicia e un sinal de identidade para Moaña. Celébrase na última fin de semana de xullo e, o que comezou sendo un par de días de celebración con folclore tradicional, pasou a converterse nun gran Festival de ata dez días de actuacións complementadas con teatro e actividades infantís. Nestes últimos certames estamos retomando as nosas orixes traendo cada día un grupo do mellor do "folc" e "tradi" galego, combinado coa mellor música celta do panorama internacional.
Así mesmo, estase enriquecendo coa celebración paralela da Mostra de Instrumentos tradicionais e os Obradoiros e clases maxistrais de artistas participantes.
Páxina en Facebook do Festival Intercéltico do Morrazo
Festa da Diversidade
Desde o departamento de igualdade, a Concellería de Mocidade e a Concellería de Turismo, levan tempo realizando proxectos en materia de diversidade dende un enfoque de dereitos humanos, favorecendo espazos para o mutuo coñecemento e visibilización de toda a diversidade existente na nosa sociedade. Así comezou a xestarse a Festa da Diversidade no Concello de Moaña cunha grande aceptación por parte da veciñanza.
Días de Mar
Moaña mira ao mar e a súa actividade festiva e turística do verán adícase ao mar, mesmo no seu nome:
Días de mar de Moaña é un completo programa de actividades lúdico-festivas que abrangue os primeiros vinte días de agosto. A súa actividade central é a Xuntanza de Embarcacións tradicionais que se celebra sempre a segunda fin de semana de agosto, todos os días hai actividades ou actuacións en diferentes puntos do Concello: así o concerto central de Días de Mar e o Certame de Habaneras celébranse no Palco da Música, o Festival de Jazz na Arboreda da Xunqueira, a Feira do Mel nos xardíns do Concello, a Festa de Bronlle na Carballeira do mesmo nome, o Concerto da Lúa e o Sol no Monte do Con.
Así mesmo existe unha celebración palarela que son as Tapas+Música de Días de mar, nas que distintos locais de hostelería ofertan tapas con actuación musical nas noites de agosto.”