Ocio e deporte

Un dos atractivos turísticos que Moaña lle ofrece a quen a visite é a posibilidade de pasar unha xornada de compras polo centro da vila, onde se encontra unha ampla oferta de establecementos, entre eles a praza de abastos, na que se pode adquirir todo tipo de produtos.
Outra posibilidade é o mercado municipal que ten lugar todos os mércores e sábados pola mañá, na explanada do paseo marítimo que hai detrás da praza de abastos.
Cun total de 120 postos, nel podemos atopar unha ampla oferta de produtos a prezos moi competitivos: roupa, calzado, complementos, música, plantas, alimentación, maquinaria agrícola e louza.

Moaña, conta tamén con diversos espazos recreativos espallados pola contorna onde poder realizar de balde diversas actividades. Entre eles atópase o carril bici, a pista de skate, o campo de petanca, pista de atletismo e varios parques infantís entre os que destacan o de Moaña e Meira, que contan cunhas completas instalacións e cunhas inmellorables vistas á ría.

O remo é un dos deportes náuticos máis populares de Galicia. A súa orixe parece estar na necesidade de rapidez nas faenas da pesca, debido á importancia que tiña ser o primeiro en chegar aos caladoiros de sardiñas e despois ser os primeiros en chegar á lonxa para vender a mellor prezo o peixe.

No remo distínguense dúas modalidades: banco fixo e banco móbil. Dentro do banco móbil preséntanse tres tipos de embarcacións: bateis, traiñeiras e traiñeiriñas.

A primeira regata que tivo lugar en Moaña foi promovida polo alcalde José Sobral Cidrás entre 1912 e 1913, posiblemente para conmemorar a construción dunha rúa. Hoxe en día, o municipio ofrece variadas exhibicións deportivas e é frecuente ver adestrar á Sociedade Deportiva Tirán ou ao Samertolameu, dous equipos de traiñeiras locais que se encontran entre os máis importantes e que participan no mes de xullo no trofeo Bandeira Concello de Moaña de Traiñeiras, onde compiten os equipos máis relevantes de Galicia.

O Campo de Golf Ría de Vigo é un prodixio de situación, beleza e deseño, coa ría de fondo. Sesenta e cinco hectáreas de extensión nas que nada foi deixado ao azar. Deseñado por Ramón Espiñenta, artífice doutros importantes campos na nosa xeografía, o Campo de Golf Ría de Vigo ten 18 buratos PAR .  Dispón tamén de 9 buratos correspondentes co campo de Pich and Putt, e diversas instalacións como son as pistas multiusos, escola de golf, piscina exterior, salas de xogos, etc . Cando falamos do Campo de Golf Ría de Vigo hai que mencionar inevitablemente a dificultade do seu percorrido con seis lagos e un río, a dificultade para “negociar” os greenes e a necesidade de utilizar os paus da bolsa e intentar a precisión antes que a lonxitude. A estas características hailles que engadir unha cuarta: a contorna.

O Campo de Golf Ría de Vigo coida especialmente o que se deu en chamar “Hoyo 19”: un restaurante especializado en comida galega e con ampla oferta en cociña internacional.
É o eixe da zona social integrada por amplos salóns, terrazas de verán e zonas de descanso; todo isto nunha construción dotada de grandes ventás coas mellores vistas do lugar.